طلباء کیلئے خوشخبری؛ میٹرک اور انٹر کے امتحانات کیلئے سلیبس میں کمی کا خاکہ جاری
کراچی: محکمہ تعلیم سندھ نے میٹرک اور انٹرمیڈیٹ کے طلباء کے سالانہ امتحانات کے لیے سلیبس میں کمی کا خاکہ جاری کردیا۔
محکمہ اسکول ایجوکیشن سندھ نے سالانہ امتحانات 2025 کے لیے نصاب میں 25 فیصد کمی کرتے ہوئے 75 فیصد سلیبس سے امتحانات لینے کا فارمولہ طے کرلیا، فارمولے کا تعین محکمہ تعلیم سندھ کے ذیلی ادارے ڈائریکٹوریٹ آف کریکولم اسسمنٹ اینڈ ریسرچ کی جانب سے کیا گیا۔
محکمہ تعلیم سندھ کی جانب سے تمام تعلیمی اداروں کو موسم سرما سے قبل نصف نصاب اور باقی ماندہ نصاب سے 50 فیصد کی تدریس مکمل کرنے کی ہدایت دے دی گئی ہے۔
محکمہ تعلیم سندھ کی جانب سے کہا گیا ہے کہ پورے سیشن 2024/25 میں کل سلیبس کا 75 فیصد پڑھایا جائے گا اور اسی سے امتحانات بھی لیے جائیں گے، تاہم نصاب میں کمی کا فیصلہ 28 نومبر کو منعقدہ اسٹیئرنگ کمیٹی کی سب کمیٹی کے اجلاس میں کیا گیا تھا۔
واضح رہے کہ میٹرک کے امتحانات 15 مارچ اور انٹر کے 15 اپریل سے شروع ہوں گے، امتحانات جلدی کی وجہ سے سلیبس کو مختصر کیا جارہا ہے۔
