![ضمنی انتخابات میں کامیاب امیدواروں کے فارم 47 جاری](https://www.bolnews.com/urdu/wp-content/uploads/2024/04/%D8%A7%D9%84%DB%8C%DA%A9%D8%B4%D9%86-%DA%A9%D9%85%DB%8C%D8%B4%D9%86-635x380.jpg)
ضمنی انتخابات میں کامیاب امیدواروں کے فارم 47 جاری
اسلام آباد: الیکشن کمیشن نے ضمنی انتخابات میں کامیاب ہونے والے امیدواروں کے فارم 47 جاری کردیے۔
الیکشن کمیشن نے ضمنی انتخابات میں کامیاب ہونے والے 22 امیدواروں کے فارم 47 جاری کئے ہیں جن میں 5 قومی اسمبلی، 12 پنجاب اسمبلی، 2 بلوچستان اسمبلی اور 2 خیبرپختونخوا اسمبلی کے کامیاب امیدوار شامل ہیں۔
بلوچستان اسمبلی کے حلقہ 50 قلعہ عبداللہ سے ری پولنگ میں ایک کامیاب امیدوار کا بھی فارم 47 جاری کیا گیا ہے۔
قومی اسمبلی
این اے 8 باجوڑ سے مبارک زیب آزاد حیثیت سے کامیاب ہوئے، این اے 44 ڈی آئی خان سے سنی اتحاد کونسل کے فیصل امین خان کامیاب قرار پائے جب کہ این اے 119 لاہور سے لیگی رہنما علی پرویز کامیاب ہوئے۔
این اے 132 قصور سے لیگی رہنما نشیر احمد خان کامیاب قرار، این اے 196 قمبر شہداد کوٹ سے پی پی پی پارلیمنٹرین کے خورشید احمد کامیاب قرار پائے۔ فارم 47 کے مطابق این اے 164 سے لیگی رہنما راشد منہاس کامیاب ہوگئے۔
پنجاب اسمبلی
پی پی 2 چکوال سے لیگی رہنما فلک شبیر اعوان، پی پی 32 گجرات سے لیگی رہنما موسی الہٰی کے فارم 47 جاری جب کہ پی پی 36 وزیر آباد سے لیگی رہنما عدنان افضل چٹھہ کامیاب قرار پائے۔
پی پی 54 نارووال سے لیگی رہنما احمد اقبال کامیاب، پی پی 93 بھکر سے لیگی رہنما سعید اکبر خان کے فارم 47 جاری جب کہ پی پی 139 شیخوپورہ سے لیگی رہنما رانا افضل حسین نے کامیاب حاصل کی۔
پی پی 147 لاہور سے مسلم لیگ ن کے محمد ریاض، پی پی 149 لاہور سے استحکام پاکستان پارٹی کے محمد شعیب صدیق اور پی پی 158 لاہور سے لیگی رہنما چوہدری محمد نواز کامیاب ہوئے۔
پی پی 266 رحیم یار خان سے پی پی پی پارلیمنٹرین کے ممتاز علی فتح یاب ہوئے جب کہ پی پی 290 ڈی جی خان سے مسلم لیگ ن کے علی احمد خان لغاری کامیاب قرار پائے۔
خیبرپختونخوا اسمبلی
کے پی اسمبلی کے حلقہ 22 باجوڑ سے مبارک زیب آزاد کامیاب جب کہ کوہاٹ حلقہ 91 سے سنی اتحاد کونسل کے داوٴد شاہ کامیاب ہوئے۔
بلوچستان اسمبلی
بلوچستان اسمبلی خضدار سے باپ پارٹی کے میر جہانزیب مینگل، لسبیلہ سے لیگی رہنما محمد زرین خان مگسی اور پی بی 50 قلعہ عبد اللہ سے ری پولنگ میں اے این پی کے زمرک خان کامیاب ہوئے۔