پی سی بی اور بی سی سی آئی چیمپئنز ٹرافی 2025 کے ہائبرڈ ماڈل انعقاد پر متفق ہو گئے ہیں جس کا باضابطہ اعلان آج متوقع ہے۔
تفصیلات کے مطابق پاکستان کرکٹ بورڈ (پی سی بی) نے ہائبرڈ ماڈل کے تحت آئی سی سی چیمپئنز ٹرافی کے انعقاد کی تصدیق کر دی ہے۔
پی سی بی اور بھارتی کرکٹ بورڈ (بی سی سی آئی) کے درمیان ہونے والی بات چیت کے بعد طے پانے والے ہائبرڈ فارمولے کے تحت معاہدے پر ایک دو روز میں دستخط متوقع ہیں، جس کا باقاعدہ اعلان آئی سی سی کی جانب سے کیا جائے گا۔
پی سی بی ذرائع کے مطابق بھارتی میڈیا میں زرتلافی کے حوالے سے چلنے والی رپورٹس من گھڑت ہیں، اور پی سی بی نے اضافی رقم دینے کی کوئی بات نہیں کی۔
ان ذرائع نے مزید کہا کہ چیمپئنز ٹرافی انیس فروری سے ہائبرڈ ماڈل کے تحت شروع ہوگی، جس میں بھارت اور پاکستان کے میچ سمیت بھارت کے دیگر میچز دبئی میں ہوں گے۔
اگر بھارتی ٹیم سیمی فائنل یا فائنل تک رسائی حاصل کرتی ہے تو یہ مقابلے دبئی میں ہوں گے، جبکہ اگر بھارتی ٹیم اس مرحلے تک نہیں پہنچتی تو یہ میچز لاہور اور راولپنڈی میں ہوں گے۔
پاکستانی کرکٹ ٹیم کے 2026 کے ٹی ٹوئنٹی ورلڈکپ کے لیے بھارت نہ جانے کے عوض، پاکستان کے تمام میچز سمیت انڈین ٹیم کے میچز کی میزبانی سری لنکا کے کولمبو اسٹیڈیم میں کی جائے گی اور 2027 کے آئی سی سی ویمنز ایونٹ کی میزبانی بھی پاکستان کرے گا۔
پی سی بی ذرائع کا کہنا ہے کہ چیمپئنز ٹرافی کے حوالے سے حتمی فیصلہ آج متوقع ہے۔
