وزیرِ اعظم محمد شہباز شریف کا چینی زبان کے عالمی دن پر پیغام
وزیرِ اعظم محمد شہباز شریف نے چینی زبان کے عالمی دن پر پیغام جاری کردیا۔
وزیر اعظم شہباز شریف کا چینی زبان کے عالمی دن پر کہنا ہے کہ چینی زبان ہزاروں سال پرانی چینی ثقافت کی ترجمان زبان ہے، چینی ثقافت اور چینی زبان دنیا بھر میں تیزی کے ساتھ مقبول ہو رہی ہے۔
انہوں نے کہا کہ اس میں کوئی شک نہیں کی آج چینی زبان دنیا بھر میں رابطے کی بڑی زبان بن چکی ہے اور اقوام متحدہ بھی چینی زبان کو رابطے کی آفیشل زبانوں میں شامل کرچکی ہے۔
ان کا کہنا تھا کہ چین پاکستان اقتصادی راہداری کے باعث پاکستان اور چین کے درمیان معاشی اور ثقافتی تعلقات تیزی سے فروغ پارہے ہیں۔
وزیر اعظم نے کہا کہ پاکستان میں چینی زبان سیکھنے والوں کی تعداد میں تیزی سے اضافہ ہو رہا ہے۔
شہباز شریف نے بتایا کہ پاکستان میں چینی زبان و ادب کی ترویج کے لئے سرکاری و نجی سطح پر ہر ممکن اقدامات اٹھائے جارہے ہیں۔ اس اقدام سے دونوں ممالک کی عوام کے درمیان روابط مزید مستحکم ہوسکیں گے۔
