![](https://www.bolnews.com/urdu/wp-content/uploads/2024/04/WhatsApp-Image-2024-04-19-at-3.37.18-PM-635x380.jpeg)
چینی باشندوں کی سیکیورٹی سے متعلق علیحدہ شعبہ قائم کیا جائے، آئی جی سندھ کی ہدایت
کراچی: انسپیکٹر جنرل (آئی جی) سندھ غلام نبی میمن نے ہدایت دی ہے کہ محکمہ اسپیشل برانچ میں چینی باشندوں کی سیکیورٹی کے حوالے سے علیحدہ شعبہ قائم کیا جائے۔
آئی جی سندھ غلام نبی میمن کی زیر صدارت چینی باشندوں کے حفاظتی انتظامات سے متعلق اعلیٰ سطح کا اجلاس سینٹرل پولیس آفس کراچی میں منعقد ہوا جس میں کراچی کے ضلع لانڈھی کے علاقے مانسرہ کالونی میں غیرملکیوں پر ہونے والے خودکش حملے سے متعلق تفصیلات پر گفتگو کی گئی۔
اجلاس میں صوبے میں موجود چائنیز سمیت دیگرغیرملکیوں مہمانوں کی حفاظت سے متعلق مختلف منصوبوں پر بھی تفصیلی گفتگو کی گئی۔
اجلاس کے دوران آئی جی سندھ نے گفتگو کرتے ہوئے کہا کہ چائنیز کی سیکیورٹی سے متعلق شعبہ کو جدید خطوط پر استوار کریں، سندھ حکومت کی غیرملکیوں سے متعلق جاری کردہ ایس او پی پرعمل درآمدیقنی بنایا جائے۔
غلام نبی میمن نے ہدایت دی کہ متعلقہ افسران سیکیورٹی اقدامات کے حوالے سے ایڈوائزری جاری کریں اور تمام افسران غیر ملکیوں کی سیکیورٹی اقدامات کا دوبارہ جائزہ لیں، سیکیورٹی جائزہ رپورٹ 3 دن کے اندر ارسال کی جائے۔
آئی جی سندھ نے مزید کہا کہ پولیس کی حکمت عملی اور اہلکاروں کی دلیری نے لانڈھی میں ہونے والا حملہ ناکام بنایا، الحمداللہ حملے میں تمام غیرملکی محفوظ رہے، چائنیز سمیت دیگر غیرملکیوں کی حفاظت کے حوالے سے مزید اقدامات کی ضرورت ہے، پولیس اور سیکیورٹی ادارے ہروقت چاک وچوبند ہیں۔
واضح رہے کہ اجلاس میں ایڈشنل آئی جیز کراچی، محکمہ انسداد دہشت گردی، ڈی آئی جیز، اسپیشل برانچ، سی پیک، ایس پی فارنرز سیکیورٹی سیل سمیت دیگر سینئر پولیس افسران شریک ہوئے جبکہ حیدرآباد، سکھر، لاڑکانہ، میرپور خاص اور شہید بینظیر آباد رینج کے ڈی آئی جیز نے ویڈیو لنک کے ذریعے اجلاس میں شرکت کی۔