وزیرِ اعظم پاکستان محمد شہباز شریف نے پاکستان مسلم لیگ ن اور پاکستان پیپلز پارٹی کے مابین سیاسی تعاون اور مختلف امور کے حل کے لیے ایک مشترکہ کمیٹی قائم کرنے کا اعلان کیا ہے۔
کمیٹی کا مقصد دونوں جماعتوں کے مابین مسائل کا حل نکالنا اور آئندہ کے لائحہ عمل کو طے کرنا ہے۔
کمیٹی کے ارکان میں نائب وزیرِ اعظم و وزیرِ خارجہ سینیٹر محمد اسحاق ڈار، وزیرِ دفاع خواجہ محمد آصف، وزیرِ قانون و انصاف اعظم نذیر تارڑ، اور وزیرِ اقتصادی امور احد خان چیمہ شامل ہیں۔
اس کے علاوہ وزیرِ ریاستی و سرحدی امور انجینئر امیر مقام، مشیر وزیرِ اعظم رانا ثناء اللہ، اسپیکر پنجاب اسمبلی ملک احمد خان، سینیئر وزیرِ پنجاب مریم اورنگزیب، خواجہ سعد رفیق، جعفر خان مندوخیل اور بشیر احمد میمن بھی کمیٹی کے ارکان میں شامل ہیں۔
وزیرِ اعظم شہباز شریف نے کمیٹی کو پاکستان پیپلز پارٹی کے ساتھ تفصیلی مشاورت کے بعد سیاسی تعاون اور مسائل کے حل کی ذمہ داری سونپی ہے۔ کمیٹی پاکستان پیپلز پارٹی کی جانب سے تعین کردہ ممبران کے ساتھ بات چیت کرے گی اور آئندہ کے لائحہ عمل کو طے کرے گی۔
اس کمیٹی کا قیام دونوں جماعتوں کے مابین سیاسی ہم آہنگی اور ملک کے مختلف مسائل کے حل کے لیے ایک اہم قدم ہے، جس سے ملک کی داخلی سیاست میں استحکام لانے کی توقع کی جا رہی ہے۔
