بابا گرونانک کا 555 ویں یومِ پیدائش؛ اسٹیٹ بینک کا 55 روپے کا سکّہ جاری کرنے کا اعلان
اسٹیٹ بینک آف پاکستان بابا گرونانک دیو جی کے 555 ویں یومِ پیدائش کے موقع پر 55 روپے کا یادگاری سکّہ جاری کرے گا۔
گرو نانک دیو جی کے 555 ویں یومِ پیدائش کے اہم موقع پر وفاقی حکومت 55 روپے مالیت کا یادگاری سکّہ جاری کر رہی ہے۔
یہ سکہ مندرجہ ذیل دھاتی ساخت، شکل اور خصوصیات کا حامل ہے۔
دھاتی ساخت: نکل اور پیتل، تانبہ 79 فیصد، زنک 20 فیصد اور نکل ایک فیصد قطر کے ساتھ ہے۔
سکہ 30 ملی میٹر
وزن 13.5 گرام
سکّے کے سامنے کے رخ پر وسط میں بڑھتا ہوا ہلال اور پانچ نوکوں کا ابھرتا ہوا ستارہ ہے۔
سکے کا رخ شمال مغرب کی طرف اور ستارے اور ہلال کے اوپر سکّے کے کنارے کے ساتھ ساتھ اردو میں ’’اسلامی جمہوریہ پاکستان‘‘ کے الفاظ کندہ ہیں۔
چاند کے نیچے اور گندم کی اوپر کی طرف خمیدہ دو بالیوں کے اوپرعددی صورت میں اجرا کا سال 2024 درج ہے۔
ستارے اور ہلال کے دائیں اور بائیں جانب بالترتیب سکّے کی مالیت جلی اعداد میں ’’55 ‘‘ اور اردو رسم الخط میں ’’روپیہ‘‘ تحریر ہے۔
یادگار کے اوپر ’’ 555th Birthday Celebrations ‘‘ اور یادگار کی عمارت کے نیچے ’’SRI GURU NANAK DEV JI ‘‘ تحریر ہے۔
سکے کے نچلے کنارے کے ساتھ ’’1469-2024‘‘ درج ہے جو ان کے یومِ پیدائش سے اب تک کی مدت کی عکاسی کرتا ہے۔
مملکتِ پاکستان مختلف مذہبی شناختوں کی وارث ہے۔
بابا گرونانک دیو جی، سکھ مذہب کی روایت کے بانی، اس سرزمین پر پیدا ہونے والی اُن عظیم ترین شخصیات میں سے ایک ہیں جو اب پاکستان کا حصہ ہے۔ سکھ مت ایک عالمی مذہب ہے جس کے دنیا بھر میں لاکھوں پیروکار ہیں اور اس کے مقدس ترین مقامات پاکستان میں واقع ہیں۔
یہ سکّہ 22 نومبر 2024ء سے ایس بی پی بینکنگ سروسز کارپوریشن کے تمام فیلڈ دفاتر کے تبادلہ کاؤنٹرز کے ذریعے جاری کیا جا رہا ہے۔
