انشااللہ جلد کرکٹ میں کم بیک کروں گی، شوال ذوالفقار پرامید
لاہور: پاکستان کی ویمن کرکٹر شوال ذوالفقار انجری سے مکمل صحتیاب ہوکر کم بیک کے لیے پر امید ہیں۔
پاکستان کی ویمن کرکٹ ٹیم کی کھلاڑی شوال ذوالفقار نے پی سی بی ڈیجیٹل میڈیا سے گفتگو کرتے ہوئے اپنی انجری کے بارے میں کھل کر بات کی۔
شوال ذوالفقار نے کہا کہ ان کی انجری کو کافی وقت ہوچکا ہے اور سرجری کو بھی تقریباً چھ ماہ ہو چکے ہیں۔
تاہم انہوں نے خوشی کا اظہار کرتے ہوئے کہا کہ وہ اب بہت بہتر محسوس کر رہی ہیں اور ان کی ریکوری بہت اچھی جارہی ہے۔
شوال ذوالفقار نے فزیو، ٹرینر اور میڈیکل کمیٹی کی مدد کا شکریہ ادا کرتے ہوئے کہا کہ ان کی بھرپور سپورٹ اور محنت کی وجہ سے وہ جلد مکمل طور پر صحت یاب ہوگئیں ہیں۔
انہوں نے کہا کہ انشاء اللہ جلد کرکٹ میں کم بیک کروں گی، کرکٹ سے ایک سال کی دوری کے دوران اس کھیل کی بہت کمی محسوس ہوئی۔
ان کا مزید کہنا تھا کہ ایک سال بعد بیٹنگ کر رہی ہوں تو کافی انرجیٹک ہوں، بہت اچھی ریکوری کرکے اپنی اسکلز شروع کی ہیں، بیٹنگ ہو یا فیلڈنگ ابھی کوئی درد محسوس نہیں کررہی۔
