غزہ اور لبنان میں جھڑپوں میں 4 اسرائیلی فوجی ہلاک، 9 زخمی
غزہ اور لبنان میں ہونے والی جھڑپوں میں 4 اسرائیلی فوجی ہلاک اور 9 زخمی ہوگئے ہیں۔
عرب میڈیا کے مطابق جنوبی لبنان میں حزب اللہ کے ساتھ جھڑپوں میں 3 اسرائیلی فوجی ہلاک اور 8 زخمی ہوگئے۔
دوسری جانب غزہ کے علاقے جبالیہ میں بھی فلسطینی مزاحمت کاروں کے حملے میں ایک اسرائیلی فوجی ہلاک ہوگیا، جبکہ اسرائیلی میڈیا کے مطابق حملے میں ایک اسرائیلی فوجی شدید زخمی بھی ہوا ہے۔
اسرائیلی میڈیا کے مطابق گزشتہ سال اکتوبر میں جنگ کے آغاز سے اب تک غزہ میں مارے گئے اسرائیلی فوجیوں کی تعداد 800 ہوگئی ہے جن میں سے 28 فوجی جبالیہ میں جاری حالیہ آپریش میں ہلاک ہوئے ہیں۔
دوسری جانب اسرائیلی فوج کی جانب سے لبنان میں 100 سے زیادہ اہداف پر حملے کیے گئے، اسرائیلی فوج کی بمباری سے گزشتہ 24 گھنٹے میں 4 لبنانی فوجی سمیت مزید 28 لبنانی شہید ہوگئے، اسرائیلی فضائیہ نے جنوبی لبنان کے تین شہروں پر فاسفورس بم برسائے۔
غزہ میں بھی اسرائیلی حملے جاری، مزید 66 فلسطینی شہید ہوگئے۔
اسرائیلی فوج نے مغربی کنارے میں 2 فلسطینی کو شہید کردیا، جبکہ شمالی غزہ پر اسرائیل کی بمباری سے48 گھنٹوں میں بیت لاحیہ میں 66 فلسطینی اور شیخ رضوان میں 22 افراد شہید ہوگئے، غزہ جنگ میں شہدا کی تعداد 43 ہزار 900 سے زاید ہوگئی، جبکہ ایک لاکھ سے زائد زخمی ہیں۔
قابض اسرائیلی فوج نےکمال عدوان اسپتال کا محاصرہ کرلیا ہے اور ایمبولینسوں کا داخلہ بھی روک دیا ہے، اسپتال میں دواؤں اور خوراک کی شدید قلت ہوگئی ہے۔
دوسری جانب اقوام متحدہ سلامتی کونسل میں غزہ جنگ بندی کی قرارداد امریکا نے ویٹو کردی، قرارداد الجزائر، گیانا اور سلوانیہ سمیت سلامتی کونسل کے 10 غیر مستقل ارکان نے پیش کی تھی۔
